VILLAVICIOSA CELEBRÓ 'L DÍA DE LA LLINGUA MATERNA

Mar d’Irlanda, en formatu llibru dixital, yá ta disponible en descarga llibre

Villaviciosa celebró esti miércoles, 21 de febreru, el día de la llingua materna con un actu na Casa de los Hevia nel que se fizo entrega  del I Premiu de Relatos Curtios 'Xosé Caveda y Nava' a Francisco Álvarez, que resultó ganador por unanimidá del xuráu pol so relatu 'Mar d'Irlanda'. Alejandro Vega, qu'apurrió al autor la Manzana de Plata conmemorativa del concursu, fizo alcordanza de la figura de Xosé Caveda y Nava (1796-1882), al que se tien calificao delles veces como'l padre de la modernidá lliteraria en llingua asturiana, y a quien se debe la iniciativa, acordies cola voluntá ilustrada de normalizar y normativizar la llingua- d'axuntar en 1839 una Colección de poesías en dialecto asturianu, conocíu como'l primer llibru de la lliteratura n'asturianu. Ye por eso que se decidió da-y el so nome al premiu de relatos curtios n'asturianu. L'alcalde resaltó la coincidencia de que'l primer llibru dixital qu'edita l'Ayuntamientu de Villaviciosa seya tamién n'asturianu. La obra premiada yá ta disponible en descarga llibre na páxina web www.villaviciosa.es y www.teatroriera.es . Completó l'eventu l'actuación de la poeta avilesina Susana Sela, que presentó xunto al músicu Maxi Areñes los testos del so últimu poemariu 'Inversu baxo l'augua'.